Aðlögun

Markmið í aðlögun er:

  • að foreldri/foreldrar þekki þá sem koma til með að taka á móti barninu og rati á deild þess 
  • að foreldri/foreldrar kynnist starfsemi leikskólans.
  • að barnið kynnist leikskólanum og starfsmönnum á rólegan og öruggan hátt með stuðningi foreldra sinna.
Aðlögun yngri barna

Dagur 1: Barn og foreldri mæta í leikskólann kl: 9:00 og eru í leikskólanum fram yfir hádegismat sem þau borða saman.

Dagur 2: Barn og foreldri mæta kl: 9:00 og eru saman fram yfir hvíld – foreldri fer með barninu í hvíld og það vaknar í leikskólanum og sér foreldri sitt.

Dagur 3: Barn og foreldri mæta kl: 9:00 og eru saman fram yfir drekkutíma.

Dagur 4: Barn og foreldri mæta á vistunartíma barnsins. Foreldri kveður barnið og fer. Einstaka barn þarf aðeins lengri aðlögunartíma, – það er einstaklingsbundið og starfsfólk og foreldrar meta hvort þess þurfi.


Aðlögun eldri barna

Er með svipuðu sniði og fyrir yngri börnin en foreldrar eru minna með börnunum þar sem þau hafa í flestum tilfellum verið á leikskóla annarstaðar þegar þau koma til okkar. Aðlögun þeirra er sniðin að barninu hverju sinni

 

Veikindi og fjarvistir barna

Fjarvistir barna

Vinsamlegast tilkynnið sem fyrst ef barn er fjarverandi t.d. vegna veikinda eða fría í síma 441-6600, inn á deild viðkomandi barns eða á netfangið: nupur@kopavogur.is

Veikindi barna

Leikskólinn er ætlaður full frískum börnum og gert er ráð fyrir að þau taki þátt í öllu starfi bæði úti og inni. Þess vegna getum við ekki tekið á móti veiku barni. Börn sem eru veik eiga að vera í rólegheitum heima þar til þau eru frísk og geta tekið virkan þátt í öllu starfi leikskólans. Ef barn fær smitandi sjúkdóm á það að vera heima þar smithætta er liðin hjá.

Foreldrar verða að sækja veik börn í leikskólann svo að veika barnið komist í rólegt umhverfi og til að minnka hættu á að önnur börn og starfsmenn smitist.

Leikskólabörn þurfa að vera það hress að þau geti tekið fullan þátt í leik og starfi. Við getum ekki komið til móts við beiðnir um fyrirbyggjandi inniveru þar sem það stangast á við stefnu leikskólans um útiveru barna.

Það er ekki hægt að koma í veg fyrir veikindi með því að vera inni. Útivera er hluti af starfsemi leikskólans og börnum mjög mikilvæg. Við stefnum að því að hvert barn fari út hið minnsta einu sinni á dag og útiveru er ekki sleppt nema í algjörum undantekningartilfellum. Þau börn sem eru inni allan daginn eru í sama loftinu allan tímann og ná ekki að hreinsa lungun, styrkja sig og efla.